ट्विटरवरून चालवण्यात आलेल्या #BlockNarendraModi या मोहिमेचा उलटाच परिणाम झालेला दिसतोय.

ज्येष्ठ पत्रकार गौरी लंकेश यांच्या हत्येच्या पार्श्वभूमीवर, गुरुवारी दिवसभर ट्विटरवरून चालवण्यात आलेल्या #BlockNarendraModi या मोहिमेचा उलटाच परिणाम झालेला दिसतोय. पंतप्रधान नरेंद्र मोदींच्या फॉलोअर्सच्या संख्येत काल लक्षणीय वाढ झाली आहे.

@narendramodi हे पंतप्रधान मोदींचं ट्विटर हँडल फॉलो करणाऱ्यांची संख्या बुधवारपर्यंत ३३.७ दशलक्ष इतकी होती. ती आता ३३.८ दशलक्ष झाली आहे. म्हणजेच, काल दिवसभरात जवळपास लाखभर ट्विपल्सनी मोदींना फॉलो करण्यास सुरुवात केलीय.

गौरी लंकेश यांच्या हत्येनंतर काहींनी ट्विटरवरून आनंद व्यक्त केला होता. त्यापैकी चौघांना पंतप्रधान मोदी 'फॉलो' करत असल्याचं निदर्शनास आल्यानं अनेकांच्या भुवया उंचावल्या होत्या. त्याच्याच निषेधार्थ 'ब्लॉक मोदी' मोहीम सुरू करण्यात आली होती. ती नेमकी कुणी सुरू केली, हे स्पष्ट झालेलं नाही. मात्र, काँग्रेसशी संबंधित व्यक्ती, काँग्रेस समर्थकांचा या मोहिमेत पुढाकार होता. अनेकांनी मोदींना ब्लॉक करून आपला संताप व्यक्त केला. तर काहींनी, या असल्या मोहिमा प्रभावी नसल्याचं मत मांडलं. मोदींच्या फॉलोअर्सची वाढलेली संख्या पाहता, ही मोहीम भाजपच्या पथ्यावरच पडल्याचं बोललं जातंय.